【理財個案】讀者：Sir，自從上次同你講轉工之後，最後過唔到3個月試用期，轉左另一份工，做左年半，但同同事關係麻麻，我屬於中層，既要同上司溝通，下面要管理下屬。
理財個案｜打工做中層吃力不討好
我係第一次做中層，上層壓落黎既野我要跟住做，但下層又唔聽order，變相我夾住係中間，吃力不討好，好多時下層既野要我落手落腳做，所以每日返工都好辛苦，同公司反映人手唔夠，加人工既問題，每次都係拖字缺，係度耍我。
未儲到錢買樓 要痴住阿爸阿媽住
同屋企人關係有時麻麻，我係屋企最細個個，對上兩個家姐都結哂婚搬哂出去住，最近其中一個家姐仲細屋搬大屋，但我出黎做野十年都仲未儲到錢買樓，仲要痴住阿爸阿媽住，阿爸阿媽雖然冇講d咩
未結婚又冇拍拖
但都會睇得出佢地擔心我，我未結婚又冇拍拖，又未買樓，冇比較冇傷害，有時佢地問我儲到幾多錢，我都冇好明確咁話比佢地知，求其講個數比佢地聽。
冇問佢地借錢 每個月準時比家用
佢地再追問，我就有d勞氣，話佢地好煩，唔好理咁多，我又冇問佢地借錢，每個月準時比家用，跟住大家就吵架。我明佢地關心我，但我就唔想佢地理我咁多野。
想快d搵地方搬出去住但又搵得唔多
但同時我又明白，佢地咁煩既原因係我冇兩個家姐咁叻可以買到樓，到而家都仲痴住佢地住，所以我都好怕留係屋企，有時聽到阿爸阿媽為左雞毛蒜皮既事都吵一餐就越想快d搵地方搬出去住但又搵得唔多。
冇錢冇權冇地位
有時覺得呢個世界無論係人際關係，職場，冇公平可言，邊個搵得錢多，邊個權力大d，職位高d，講既就係道理，冇錢冇權冇地位就註定比叻既人恰
龔成老師分析︰中層係一個吃力不討位置
我都明白，做中層係一個吃力不討好架位置，好考你架溝通和管理能力。特別係近年經濟弱，話語權更加少左。你要明白，我地做好多野，唔一定要同人比較，因為每個人都係獨特，無人會想法、目標、生活模式完全一樣。只要唔好影響倒人，咁就可以。
資本主義架社會會影響一個人話語權
至於財富，的確係而個資本主義社會，係會影響一個人話語權。所以，我地一定程度，都要努力去令自己掌握更多財富，增加自己架話語權，去掌握自己架人生。所以，點解我成日叫人學好投資。
增升財富 搶翻自己話語權
因為佢就係可以幫你增升財富，搶翻自己架話語權。同埋，佢係你自己架知識，無人搶倒。就算你轉再多架工作，只要每月有錢儲到，就可以應用而個技術幫自己財富增值。
快樂和成就係唔需要同人比
當然，我唔會認為財富金錢代表一切。但如果你想過一D自己想過生活，財富的確有佢影響性。至於你快樂和成就，係唔需要同人比。有人要住大屋先滿足，有人只要每星期食個好食架晚餐，已經好滿意，所以唔洗去比。
要比，就同過去架自己比，睇下自己係唔係進步緊。記住，唔好將令自己快樂架權利，交左去別人架手上。
加油！！！
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
